कञ्चनपुर: अज्ञात समूहबाट आफू अपहरणमा परि सामूहिक बलात्कार भएको भन्दै किशोरीले प्रहरी समक्ष दिएको बयान झुटो पुष्टि भएको छ । पुनर्वास नगरपालिका–२ मोतिबस्ती बस्ने १४ वर्षीय किशोरीले आफूलाई अपहरण गरी सामूहिक बलात्कार गरिएको भन्दै परिवार र प्रहरीलाई बयान दिएकी थिइन। आफ्ना प्रेमीलाई भेटेर फर्किदा ढिलो भएपछि पारिवारिक डरले उनले प्रहरी र परिवारलाई झुटो बयान दिएको खुल्न आएको छ।
उनले शुक्रवार साँझ साढे ७ बजेतिर कलम किन्न नजिकैको पसलमा जाने क्रममा मोटरसाइकलमा आएका ३ जना अज्ञात युवकहरूले अपहरण गरी बलात्कार गरेर मध्यरातमा सोही ठाउँमा छोडेर गएको भन्ने बयान दिएकी थिइन् ।तर, २४ घण्टा नबित्दै किशोरीले दिएको बयान झुटो पुष्टि भएको जिल्ला प्रहरी कार्यालय कञ्चनपुरका प्रवक्ता प्रहरी नायव उपरीक्षक अमरबहादुर थापाले बताएका छन्।
‘किशोरीले ३ जनाले अपहरण गरेको र बलात्कार गरेको बताएकी थिइन्, तर त्यो झुट रहेछ’ डिएसपी क्षेत्रीले भने, ‘किशोरीले प्रेमी भेट्न गएको र घर फर्किन ढिला भएपछि परिवारको डरले झुटो बोलेको खुलेको छ ।’
किशोरीका १५ वर्षीय प्रेमीलाई समेत नियन्त्रणमा लिई उनी माथि जबरजस्ती करणी अन्तर्गत अनुसन्धान भइरहेको समेत प्रहरी प्रवक्ता थापाले बताए ।किशोरीको उमेर कम रहेकोले उनका प्रेमी माथि जबरजस्ती करणी अन्तर्गत अनुसन्धान गरिरहेका डिएसपी थापाले बताए । किशोरीले आफ्नो परिवारकै सामु आफू अपहरणमा नपरी प्रेमीलाई भेट्न गएको कुरा स्वीकार गरेको समेत प्रहरीले जनाएको छ ।
