सर्लाही: सर्लाही सदरमुकाम मलंगवा–१० का नागेन्द्रराय यादवका ३० वर्षीय छोरा सुशीलको बिहीबार बिहान टाउको छिनालिएको अवस्थामा शव फेला परेको छ ।
प्रहरीका अनुसार मलंगवा नगरपालिका–९ स्थित पचगछिया चौरीको खेतमा रायको शरीर र टाउको ६१ मिटर वरपर फेला परेको थियो । घटनास्थलबाट तीन किलोमिटर आसपास बस्ती छैन ।
स्थानीयले बिहीबार बिहान पचगछिया चौरीको खेतमा टाउकोबिनाको शव देखेपछि प्रहरीलाई खबर गरेका थिए । घटनास्थल चौरी भएको र आलीमा अरहरले छेकिएको हुनाले बेलैमा कसैले भेउ पाउन सकेन । सूचना पाएलगत्तै प्रहरी उपरीक्षक सन्तोषसिंह राठौर आफैं घटनास्थल पुगेका थिए । बुधबार साँझ एकैछिनमा आउँछु भनेर घरबाट निस्केका सुशील अबेर रातिसम्म घर नआएको परिवारजनले जनाएका छन् ।
कसैले योजना बनाएरै हत्या गरेको दाबी मृतकका आफन्तले गरिरहेका छन् । विभिन्न कोणबाट हत्याको अनुसन्धान भइरहेको र संलग्नको नजिक पुगेको प्रहरीले जनाएको छ । श्रीमतीले छाडेपछि सुशील केही वर्षयता घरमै बसिरहेका थिए ।
