धनगढी : सुदूर पश्चिमाञ्चल एकेडेमी एस.पी.ए कलेज धनगढीमा सम्पन्न रक्तदान कार्यक्रममा ३५ जनाले गरे रक्तदान गरेका छन् । पछिल्लो समय रगत चाहिने बिरामीलाई उपचारका लागि रगत पाउनै मुस्किल भइरहेको जानकारी पाएपछि धनगढी जेसिजले सप्ताहव्यापी कार्यक्रम अन्तर्गत एस.पी.ए कलेजको संयोजनमा रक्तदान कार्यक्रमको आयोजना गरिएको हो ।
एसपीए कलेज परिसरमा आयोजित रक्तदान कार्यक्रममा एसपीए कलेजका प्राचार्य योगराज उपाध्याय, कलेजमा अध्ययनरत विद्यार्थी, जेसिज सदस्य गरी ३५ जनाले रक्तदान गरेको धनगढी जेसिजका रक्तदान कार्यक्रम संयोजन चन्द्रकान्त पनेरुले जानकारी दिए ।
नेपाल रेडक्रस सोसाइटी प्रादेशिक रक्तसञ्चार केन्द्रको प्राविधिक सहयोग रहेको उक्त रक्तदान कार्यक्रममा ४ जना महिला र ३१ जना पुरुष गरी ३५ जनाले रक्तदान गरेको र रक्तदाताहरूलाई प्रमाणपत्र समेत प्रदान गरिएको जेसिज सप्ताहका संयोजक तर्कराज भट्टले बताए ।
सो अवसरमा बोल्दै कलेजका प्राचार्य योगराज उपाध्यायले एसपीए कलेज सधैँ समाजमा सकारात्मक कार्यहरू गर्न अग्रसर रहेको तथा रक्तदान गर्न र पुण्य कार्यका लागि संयोजन गर्न पाउँदा निकै नै खुसी लागेको बताउँदै समाजको भलाइको लागि गरिने कार्यहरूमा एस.पी.ए गर्न सक्ने सहयोगका लागि तयार रहेको समेत बताए ।
रक्तदान कार्यक्रममा धनगढी जेसिजका अध्यक्ष अरुण सिंह, एसपीए कलेजका प्रधानाध्यापक योगराज उपाध्याय, सुदूरपश्चिमका सर्वाधिक रक्तदाता दीपक उपाध्याय, धनगढी जेसिजका निवर्तमान अध्यक्ष मोहन ओझा लगायतको उपस्थिति रहेको थियो ।
