काठमाडौं : नेपाली पारा तेक्वान्दो खेलाडी पलेशा गोवर्धनले पारा ओलम्पिकमा ऐतिहासिक कांस्य पदक जितेकी छन् ।
नेपाली खेलकुदले जितेको यो अहिलेसम्मकै ठूलो पदक हो ।ओलम्पिकमा नेपाली खेलाडीले जितेको यो पहिलो आधिकारिक पदक हो ।
पलेशाले पेरिसस्थित ग्रान्ड प्यालेसमा शुक्रबार राति के-४४ विधाअन्तर्गत महिला ५७ केजी तौल समूहबाट कांस्य जितेकी हुन् । उनले रिपिचेजको दोस्रो खेलमा सर्बियाकी मरिजा मिचेभलाई १५-८ स्कोरले हराइन् ।
पलेशाले दोस्रो पारा ओलम्पिक सहभागितामा पदक ल्याउन सफल भइन् । गत संस्करण उनी चिनकी खेलाडीसँग कांस्य पदक भिडन्तमा पराजित भएकी थिइन् ।
सन् १९८८ को सोल ओलम्पिकमा तेक्वान्दोका विधान लामाले प्रदर्शनी खेलमा कांस्य पदक जितेका थिए । नेपालले सन् १९६४ को टोकियोदेखि ग्रीष्मकालीन ओलम्पिकमा तथा सन् २००४ एथेन्सबाट पारा ओलम्पिक खेल्न थालेको हो ।
यसअघि पलेशा शीर्ष वरीयताकी ब्राजिलियन खेलाडी सिल्भाना फर्नान्डेससँग १०-८ ले पराजित हुँदा सेमिफाइनल पुग्न असफल भएकी थिइन् । रिपिचेजमा पहिलो खेलमा फ्रान्सकी चौथो वरीयताकी सोफी कार्भजनलाई २-१ स्कोरले हराएपछि पलेशा कांस्य पदक नजिक पुगेकी थिइन् ।
पहिलो चरणमा पलेशाले भेनेजुएलाकी भलेरिया मोराल्सविरुद्ध पिटिजीको आधारमा ३१-० को सहज जित निकालेकी थिइन् ।
कविरस नेगी लामाको प्रशिक्षणमा रहेकी पलेशा गत चैतमा चीनमा सम्पन्न एसियाली ओलम्पिक छनोट चरण जित्दै पेरिस पुगेकी हुन् ।
