धनगढीः बलियो टोली मानिएको सुदूरपश्चिम रोयल्सलाई हराउँदै चितवन राइनोजले नेपाल प्रिमियर लिग (एनपीएल) मा तेस्रो जित निकालेको छ।
त्रिवि क्रिकेट मैदान कीर्तिपुरमा आइतवार भएको खेलमा चितवनले सुदूरपश्चिमलाई ३३ रनले हरायो। चार खेलमा चितवनको यो तेस्रो जित हो। सुदूरपश्चिमले चार खेलमा पहिलो हार खेपेको छ। जितका लागि एक सय ६५ रनको लक्ष्य पछ्याएको सुदूरपश्चिमले निर्धारित २० ओभरमा सवै विकेटको क्षतिमा एक सय ३१ रन बनायो ।
सुदूरपश्चिमका लागि इशान पाण्डेले सर्वाधिक ३५ रन बनाए। यस्तै ओपनर सईफ जैवले १८, स्कट कुग्लेजिनले १६, ब्रान्डन म्याकमुलेनले १३, दिलप्रित बाजवाले १२, विनोद भण्डारी र नरेन साउदले समान १०÷१० रन बनाए। बलिङमा चितवनका कुशल मल्ल, जान निकोल, अमर रौटेला र रिजन ढकालले दुई दुई विकेट लिए।
रन्जित कुमारले एक विकेट झारे। यसअघि टस जितेर पहिलो ब्याटिङ गरेको चितवनले निर्धाीरत २० ओभरमा पाँच विकेटको क्षतिमा एक सय ६४ रन बनाएको थियो। चार खेलमा पहिलो हार खेपेको सुदूरपश्चिमको ६ अङ्क छ। समान खेलमा तेस्रो जित निकालेको चितवनले पनि ६ अङ्क बनाएको छ।
