धनगढी : लक्ष्मण राजवंशी अवार्ड ‘सुदूरपश्चिम रत्न’ सम्मान प्राप्त गरेका सुवास शाहीले पुरस्कार राशि खेलकुद प्रवर्धनमा खर्च गर्ने प्रतिबद्धता जनाएका छन् । एलआरआई स्कुलले आफ्नो ३७औँ वार्षिकोत्सवको अवसरमा शाहीलाई लक्ष्मण राजवंशी अवार्डसहित सम्मान गरेको थियो ।
शाहीले सम्मानपछि प्रतिक्रिया दिँदै यस सम्मानले सुदूरपश्चिमका सम्पूर्ण खेल प्रेमी, खेलाडी, प्रशिक्षक तथा खेल क्षेत्रका अन्य योगदानकर्ताहरूको सामूहिक प्रयासको कदर गरेको अनुभूति गराएको बताएका छन् । भने सामूहिक प्रयासको कदर स्वरूप प्राप्त एक लाख रुपैयाँ नगद पुरस्कार धनगढी उप-महानगरपालिका भित्रका सामुदायिक विद्यालयहरूलाई आवश्यक खेल सामाग्री उपलब्ध गराउन उपयोग गर्ने शाहीले घोषणा गरेका छन् ।
सुदूरपश्चिममा क्रिकेट प्रवर्धन गर्दै आएका शाहीले सन् २०१६ मा धनगढीमा अक्सनमार्फत नेपालमा पहिलो पटक सिटी बेस फ्रेन्चाइज क्रिकेट सुरु गरेका थिए । उनले सञ्चालनमा ल्याएको धनगढी क्रिकेट एकेडेमीले अहिले युवा क्रिकेट प्रतिभाहरू उत्पादन गरिरहेको छ।
यसै वर्षदेखि उनले आफ्नो संस्था गो ड्रिमर्स मार्फत अर्जुन ट्रफी राष्ट्रिय क्रिकेट प्रतियोगिता सञ्चालनमा ल्याएका छन् । हाल सरकारले शाहीलाई फाप्ला अन्तर्राष्ट्रिय क्रिकेट रंगशाला तथा खेलग्राम पूर्वाधार निर्माण विकास समितिको बोर्ड अध्यक्षको जिम्मेवारी दिएको छ।
एलआरआई स्कुलमा आयोजित कार्यक्रममा पर्यटनविद् कर्ण शाक्य, एलआरआईका संस्थापक शिवराज पन्त, निर्देशक देवकान्त जोशी र प्रधानाध्यापक बादल प्रधानलगायतले शाहीलाई सम्मान गरेका थिए।

शाहीले आफ्नो आधिकारीक फेसबुक पेजमा लेखेका छन्ः
मलाई ‘सुदूरपश्चिम रत्न’ सम्मान प्रदान गरेकोमा एलआरआई स्कुल परिवारप्रति हार्दिक कृतज्ञता व्यक्त गर्न चाहन्छु। यो सम्मान प्रसिद्ध पर्यटनविद् कर्ण शाक्यज्यूको हातबाट प्राप्त गर्न पाउनु मेरो लागि विशेष गर्वको कुरा हो । यस सम्मानले सुदूरपश्चिमका सम्पूर्ण खेलप्रेमी, खेलाडी, प्रशिक्षक तथा खेल क्षेत्रका अन्य योगदानकर्ताहरूको सामूहिक प्रयासको कदर गरेको अनुभूति गराएको छ। क्रिकेटलाई विशेष प्राथमिकतासहित सुदूरपश्चिमलाई खेलकुदको केन्द्र बनाउन योगदान दिने सबै व्यक्तित्वहरू यस सम्मानका वास्तविक विजेता हुन्।
यस सम्मानलाई सार्थक बनाउन, प्राप्त एक लाख रुपैयाँको नगद पुरस्कार धनगढी उपमहानगरपालिकाभित्रका सामुदायिक विद्यालयहरूलाई आवश्यक खेल सामाग्री उपलब्ध गराउन उपयोग गर्ने प्रतिवद्धता गर्दछु, जसले भविष्यका खेलाडीहरूलाई आफ्नो प्रतिभा प्रस्फुटन गर्न मद्दत गर्नेछ।
यस यात्रामा साथ दिनु हुने सबैलाई धन्यवाद ! हामी मिलेर आगामी पुस्ताका खेलाडीहरूलाई प्रेरित गर्दै उनीहरूको भविष्य उज्ज्वल बनाउनेछौं। धन्यवाद !
स्टाटस जस्ताको त्यस्तै :