धनगढी । नेपाल प्रिमियर लिगको फ्रेन्चाइज टोली धनगढी एफसीले स्पेनका जुआन म्यानुएल मार्टिनेज सेजलाई मुख्य प्रशिक्षकमा नियुक्त गरेको छ ।
क्लबले एनएसएलको तेस्रो संस्करणका लागि सेजसँग सम्झौता गरेको हो । युइएफए प्रो लाइसेन्स प्राप्त सेजसँग स्पेन, पानामा, थाइल्यान्ड, ओमान, माल्दिभ्स र बंगलादेशकाे प्रशिक्षण अनुभव छ ।
सेजले मुख्य प्रशिक्षकमा नियुक्त हुन पाउँदा खुसी लागेको बताए । उनले भने,‘यो अवसरका लागि म निकै नै खुशी छु । हामी फुटबल फ्यानहरूका लागि अविस्मरणीय सिजन बनाउन स्पेनिस र नेपाली फुटबल शैलीलाई संयोजन गर्ने प्रयास गर्नेछौं ।’
यसैगरी धनगढीका अध्यक्ष सुवास शाहीले सेजसँगको सहकार्यले टोलीलाई नयाँ उचाइमा पुर्याउने विश्वास लिएको प्रतिक्रिया दिए । हाम्रो यो प्रयासले धनगढी र यहाँको खेलकुदलाई युरोपसम्म जोडेर विश्वव्यापीकरण गरेकाे छ । यो नेपाली खेलकुदलाई विश्वभरी चिनाउने एउटा महत्वपूर्ण खुट्किलो हो,’ शाहीले भने, ‘एनएसएलको तेस्रो संस्करणमा सेजको नेतृत्वमा धनगढी एफसीलाई नयाँ उचाईमा पुर्याउने विश्वास लिएका छौं ।’
धनगढी एफसीले नेपाली राष्ट्रिय टोलीका मिडफिल्डर कृतिश रत्न छिन्जुलाई मार्की खेलाडी बनाएको छ । यसैगरी क्लबले लेबनानका फर्वाड अहमद हिजाजीलाई पनि अनुबन्ध गरिसकेकाे छ ।
धनगढी अघिल्ला दुवै संस्करणको उपविजेता हो । धनगढी पहिलो संस्करणमा काठमाडौं रेजर्स तथा दोस्रो संस्करणमा ललितपुर सिटी एफसीसँग पराजित भएको थियो ।
यस्तै क्लबले राष्ट्रिय क्रिकेट टोलीका अलराउन्डर दीपेन्द्रसिंह ऐरीलाई ब्रान्ड एम्बासडल बनाएको छ ।
