धनगढी : बाजुराको प्रसिद्ध धार्मिक स्थल बडीमालिकामा दर्शनार्थीको भीड लागेको छ । जनैपुर्णिमाको अवसर पारी दर्शन गर्ने दर्शनार्थीको शुक्रबार बडीमालिकामा भीड लागेको हो ।
साउन शुक्ल चतुर्दशीमा लाग्ने मेला तथा विशेष पूजाका लागि देशभरका तीर्थयात्रीहरू बिहानैदेखि बडिमालिका पुगेका छन् । डोटी, जुम्ला, कालिकोट, धनगढी लगायतका जिल्लाबाट पेटारा सहितको सरकारी टोली पनि पूजाका लागि बडिमालिका पुगेको प्रमुख जिल्ला अधिकारी मेघनाथ पाध्यायले जानकारी दिए ।
पूजाआराधना शान्तिपूर्ण ढंगले सञ्चालन भईरहेको उनले बताए । मेलाको व्यवस्थापन तथा सुरक्षा लागि नेपाल प्रहरी, नेपाली सेना र सशस्त्र प्रहरीसहित करिब १०० जना सुरक्षाकर्मी खटिएका छन् । हरेक वर्ष जनैपूर्णिमाको अघिल्लो दिन लाग्ने बडिमालिका मेलामा भारतको उत्तर प्रदेश लगायत देशका विभिन्न जिल्ला र प्रदेशबाट ठूलो संख्यामा दर्शनार्थी सहभागी हुने गरेका छन् । धार्मिक विश्वास अनुसार बडिमालिकामा पूजाआराधना गरेमा मनोकामना पूरा हुने मानिन्छ ।
