धनगढी : धनगढी रंगशाला फेरि एकपटक बाल फुटबलको जोशले गुञ्जिएको छ। एन्फा यु–१४ अन्तर विद्यालयस्तरीय महिला र पुरुष फुटबल प्रतियोगिता अन्तिम चरणतिर पुगेको छ, जहाँ बाल खेलाडीहरूले आफ्नो सपना र कौशल मैदानमा उतारिरहेका छन्।
अखिल नेपाल फुटबल संघ (एन्फा) को वार्षिक कार्यक्रमअन्तर्गत कैलाली जिल्ला फुटबल संघले आयोजना गरेको एसपीए कलेज एन्फा यु–१४ अन्तर विद्यालयस्तरीय महिला तथा पुरुष फुटबल प्रतियोगिता धनगढीमा जारी छ।
जिल्लाभरका २० विद्यालयबाट पुरुषतर्फ १७ र महिलातर्फ ९ गरी कुल २६ टोलीले प्रतियोगितामा सहभागिता जनाएका छन्। लिगकम नकआउट ढाँचामा चलिरहेको प्रतिस्पर्धामा बाल खेलाडीहरूले उत्कृष्ट प्रदर्शन गर्दै दर्शकको मन जितिरहेका छन्।
पुरुषतर्फ अब सत्यवति एकेडेमी र मोहन्याल माध्यमिक विद्यालय फाइनलमा भिड्ने भएका छन्। समूह चरणदेखि नै स्थिर र प्रभावशाली प्रदर्शन गर्दै दुवै टोलीले उपाधि यात्रालाई सुनिश्चित गरेका हुन्।
फाइनलमा पुग्न पाउँदा खुशी लागेको बताउँदै सत्यवति एकेडेमीका कप्तानले यो उपलब्धि टिमवर्क र मेहनतको नतिजा भएको प्रतिक्रिया दिए। उनले फाइनलमा जित्ने लक्ष्यसहित मैदानमा उत्रिने प्रतिबद्धता व्यक्त गरे।
त्यस्तै, मोहन्याल मा.वि.का कप्तानले पनि प्रतियोगिताले खेलाडीहरूलाई ठूलो सिकाइ र आत्मविश्वास दिएको भन्दै साथिहरूलाई सर्वोत्तम खेल कौशल प्रस्तुत गर्न आग्रह गरे।
सत्यवति एकेडेमीका प्रशिक्षक सन्तोषले हालसम्मको यात्रा सफल रहेको उल्लेख गर्दै फाइनल जित्ने विश्वास व्यक्त गरे।
उता मोहन्यालका प्रशिक्षक महेन्द्र बोहराले प्रतियोगिताले बाल खेलाडीहरूलाई ठूलो प्रेरणा दिएको बताए। उनले हारजित खेलको स्वाभाविक हिस्सा भए पनि जितका लागि टिमले भरपुर प्रयास गर्ने बताए।
कैलाली जिल्ला फुटबल संघका प्रशिक्षक तथा प्रतियोगिताका टुर्नामेन्ट कोर्डीनेटर शंकर तिरुवाका अनुसार प्रतियोगिताको मुख्य उद्देश्य ग्रासरुट स्तरका खेलाडीलाई प्लेटफर्म प्रदान गर्नु हो। उनका अनुसार विद्यालयहरूको प्रतिक्रिया सकारात्मक छ र प्रतियोगिता सफलतापूर्वक अघि बढिरहेको छ। उनले फाइनल खेल प्रत्यक्ष हेर्नका लागि सबै फुटबलप्रेमीलाई रङ्गशाला आउन आग्रह गरे।
अब सबैको नजर फाइनलतर्फ केन्द्रित छ। धनगढी रङ्गशालामा हुने अन्तिम टक्करमा युवा खेलाडीहरूको संघर्ष, उमंग र भविष्यको सुरुवात एकैसाथ देख्न सकिनेछ।
You must be logged in to post a comment.