धनगढी: कैलालीको चिसापानीमा बिच भलिबल प्रतियोगिता हुने भएको छ । एडभेन्चर रिसोर्टले मङ्गलवार धनगढीमा पत्रकार सम्मेलनको आयोजना गर्दै चिसापानीमा बिच भलिबल प्रतियोगिता गरिने जनाएको छ ।
सुदूरपश्चिममा खेल पर्यटनलाई विकास गर्ने धेयेले सुदूरका ८८ ओटै स्थानीय तहहरूलाई समेट्ने गरी चिसापानीमा बिच भलिबल प्रतियोगिता आयोजना गरिने एडभेन्चर रिसोर्टका सञ्चालक तपेन्द्र रावलले बताए ।
रावलले भलिबल खेल चैत्र १० देखि चैत्र १६ गते सम्म खेलाइने र खेलसँगै सांस्कृतिक महोत्सव पनि सञ्चालन हुने बताए । महोत्सवमा राष्ट्रिय तथा स्थानीय कलाकारको प्रस्तुति रहने जनाइएको छ ।
प्रतियोगितामा सुदूर पश्चिमका सम्पूर्ण स्थानीय तहबाट एक एक ओटा भलिबल टिमको सहभागिता गराइने आयोजकको भनाइ छ । नेपालमै पहिलो पटक कर्णाली नदी किनारको बालुवामा हुने बिच भलिबल प्रतियोगितामा प्रथम हुने टिमलाई १ लाख, दुतिय हुने टिमलाई ५० हजार र तृतीयलाई २५ हजार पुरस्कार प्रदान गरिने आयोजकले जनाएको छ।
