धनगढी : शैक्षिक नगरी धनगढीमा रहेको नेपाल वस्टर्न एकेडेमी (एनडव्लुए) र काठमाण्डौको युनिग्लोब कलेजबिच आपसी सहकार्य तथा सिकाइ सञ्चालन सम्बन्धी सम्झौता भएको छ ।
आज धनगढीमा एक कार्यक्रमका बिच नेपाल वस्टर्न एकेडेमीका प्रबन्ध निर्देशक शैलेस कुमार सिंह र युनिग्लोब कलेजका प्रबन्ध निर्देशक तथा प्रिन्सिपल प्राध्यापक डाक्टर नरबहादुर विष्टका बिच समझदारी पत्र आदानप्रदान भएको छ ।
समारोहमा एकेडेमीका डाइरेक्टर भीम चौधरी तथा कार्यक्रम निर्देशक र युनिग्लोब कलेजका प्राज्ञिक निर्देशक राधेश्याम प्रधान, निर्देशक डाक्टर गंगाधर दाहाल र कार्यक्रम निर्देशक अनन्त घिमिरे लगायतको सहभागिता रहेको थियो ।
एनडब्लुए र ग्लोबलबिच शैक्षिक क्रियाकलाप आदानप्रदान र अनुसन्धान, विद्यार्थी आदानप्रदान र सिकाइका विषयमा सहकार्य हुने एकेडेमीले जनाएको छ । यस अन्तर्गत संकाय र कर्मचारी सदस्यहरूको आदानप्रदान तथा विद्यार्थी आदानप्रदान गरिने नेपाल वस्टर्न एकेडेमीका प्रबन्ध निर्देशक शैलेस कुमार सिंहले जानकारी दिए ।
यसका साथै आपसमा संयुक्त अनुसन्धान र परियोजना कार्यहरू सञ्चालन गर्ने र शैक्षिक एवं प्राज्ञिक क्षमता लगायतका लागि गतिविधि र सेमिनार आयोजना गरिने नेपाल वस्टर्न एकेडेमी र युनिग्लोब कलेज बिच भएको सम्झौतामा उल्लेख गरिएको छ ।
