धनगढी : डोटीमा एक जना स्थानीयले शिव पार्वतीको मूर्ति बनाएका छन् । जिल्लाको के.आई.सिंह गाउँपालिका वडा न.६ फलेडीका हरिलाल जोशीले आफ्नै व्यक्तिगत लगानीमा उक्त मूर्ति बनाएका हुन् ।
जोशीले आफ्नै कलामा बनाएको शिव पार्वतीको मूर्तिको सुदूरपश्चिम प्रदेश सरकारका मुख्यमन्त्री त्रिलोचन भट्टले शुक्रवार उद्घाटन गरेका छन् ।
जोशी विगत १०-१५ वर्ष देखि काठमा शिला तथा मूर्ति बनाउने काम गर्दै आएका थिए । उनले स्थानीय, प्रदेश र सङ्घीय सरकारले आर्थिक सहयोग गरेमा आगामी दिनमा अझै बृहत् रूपमा आफ्नो कलालाई अगाडि बढाउने बताएका छन् ।
यस्तै, के.आई.सिंह गाउँपालिका वडा न.६ का वडा अध्यक्ष कृष्ण प्रसाद जोशीले यस्ता प्रतिभा भएका व्यक्तिलाई स्थानीय सरकारले खोजी गरी आर्थिक सहयोग गर्ने बताएका छन् ।
त्यस्तै, सुदूरपश्चिम प्रदेश सरकारका मुख्यमन्त्री त्रिलोचन भट्टले यश किसिमका प्रतिभा भएका व्यक्तिलाई प्रदेश सरकारले सम्मान गर्ने तथा यस्ता कलालाई खोजी गरी कला प्रदर्शन गर्न सहयोग गर्ने बताएका छन् ।
