धनगढी: नेपाली काँग्रेस जिल्ला कार्यसमिति कैलालीको बैठक विवादित बनेको छ । जिल्ला सभापति नारायणदत्त भट्ट र उपसभापति भीम बडूवालको बिचमा माइन्युट खोसाखोस भएपछि बैठकमा चर्काचर्की भएको हो ।
सचिव नृप सुनारले बैठकमा उपस्थित भएका पदाधिकारी तथा कार्यसमिति सदस्यको हस्ताक्षर गराउने क्रममा अनुशासनको कारबाही गरिएका उपसभापति बडूवालले माइन्युटमा आफ्नो नाम किन नराखिएको भन्दै माइन्युट खोसेपछि विवाद भएको जनाइएको छ ।
जिल्लाको मोहन्याल गाउँपालिका–१ चोसेकाँडामा बिहीबार बोलाइएको उक्त कार्यसमितिको बैठकमा सुदूरपश्चिमका मुख्यमन्त्री कमलबहादुर शाहको समेत उपस्थिति रहेको थियो ।
बैठक नबस्दै विवाद र कोरम नै नपुगेपछि जिल्ला कार्य समितिको बैठक स्थगित गरिएको छ।
