कैलाली : धनगढी उपमहानगरपालिकाका मेयर गोपाल हमालले नगरवासीका गुनासा, सल्लाह, सुझाव तथा समस्या सम्बोधनका लागि ह्वाटस्एप नम्बर सार्वजनिक गरेका छन्।
उपमहानगरपालिकामा सोमबार पत्रकार सम्मेलन गरेर आफ्नो ह्वाटस्एप नम्बर सार्वजनिक गरेका हुन्।
सार्वजनिक सरोकारका सवालमा नगरवासीका गुनासा, पीरमर्का सुन्न, सल्लाह सुझावका लागि भन्दै मेयर हमालले ९८५८४८८८९५ नम्बर सार्वजनिक गरेका छन्। नम्बर सार्वजनिक गर्दै मेयर हमालले उक्त नम्बर आफैसंग रहने बताउँदै व्यक्तिगत कामका लागि यो नम्बरमा फोन नगर्न आग्रह समेत गरे ।
मेयर हमालले विकास निर्माणको काममा कहीँ कमसल सामग्री प्रयोग, गलत काम, कर्मचारीबाट ढिलासुस्ती वा नागरिकलाई दुःख दिने काम भएको छ भने आफूलाई कल गर्न आग्रह गर्दै उक्त कुराको सुनुवाइ तुरुन्तै गरिने बताए ।
