नागरिक उन्मुक्ति पार्टी सरकारमा नजाने भएको छ । डिल्लीबजार कारागारमा रहेका रेशम चौधरीसँग प्रतिनिधिसभा सदस्य, प्रदेशसभा सदस्य र पार्टीका शीर्ष नेताहरुको छलफलपछि पार्टीले सरकारमा नजाने निर्णय गरेको हो ।
नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारलाई समर्थन गरेर विश्वासको मत दिए पनि तत्काल सरकारमा नजाने निर्णय गरेको पार्टीले जनाएको छ ।
सरकारमा सहभागी हुन पार्टीले रेशम चौधरीलगायतको रिहाइ हुनुपर्ने माग नागरिक उन्मुक्ति पार्टीले अघि सारेको छ ।
त्यस्तै टीकापुर घटनापछि गिरिशचन्द्र लाल नेतृत्वको आयोगले तयार पारेको प्रतिवेदन सार्वजनिक गर्न पार्टीले माग राखेको छ ।
झूटा मुद्दाहरू खारेजको माग पनि पार्टीले अघि सारेको छ । आइतबार बालकोट पुगेकी केन्द्रीय अध्यक्ष रन्जिता श्रेष्ठले पनि त्यहाँ पार्टीको तीन बुँदे माग राखेकी थिइन् ।
