काठमाडौँ: नेकपा उपाध्यक्ष बामदेव गौतम तथा गृहमन्त्री समेत रहेका नेता रामबहादुर थापा बादल कुनै पनि पक्षले बोलाएको केन्द्रीय समिति बैठकमा सहभागी नहुने भएका छन् ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारी प्रतिनिधिसभा विघटन गरेपछि नेकपा फुटको संघारमा छन् ।
अध्यक्ष समेत रहेका ओली र अर्का अध्यक्ष पुष्पकमल दाहाल प्रचण्ड तथा नेता माधवकुमार नेपाल पक्षले मंगलबार छुट्टाछुट्टै केन्द्रीय समितिको बैठक बोलाएका छन् ।
ओलीले बालुवाटारमा केही बेरमा बैठक सुरु गर्दै छन् भने प्रचण्ड–नेपाल पक्षले दिउँसो १ बजेका लागि बैठक बोलाएका हुन् ।
नेता गौतम र बादलले दुवै पक्षको बैठकमा सहभागी नहुने निर्णय गरेको उनीहरुको सचिवालयले जनाएको छ ।
बादल मन्त्री निवास पुल्चोक तथा गौतम आफ्नै निवास भैँसेपाटीमा आफू निकट नेताहरुसँग छलफलमा छन् ।
यसैबिच दुवै पक्षको बैठक बस्ने स्थानहरुको सुरक्षा व्यवस्था कडा पारिएको छ । बालुवाटार तथा बबरमहल क्षेत्रमा सुरक्षाकर्मीको तैनाथी बाक्लो छ ।
