धनगढी : सिद्धार्थ बैंक नेपाल प्रिमियर लिग एनपिएल को उद्घाटन खेलमा जनकपुर बोल्टले सहजै जित निकालेको छ। जनकपुरले शनिबार कीर्तिपुरस्थित त्रिवि मैदानमा भएको खेलमा विराटनगर किंग्सलाई ८ विकेटले पराजित गरेको हो।
विराटनगरले दिएको १२८ रनको लक्ष्य जनकपुरले १५.३ ओभरमा २ विकेट गुमाएर पूरा गर्यो। जनकपुरको जितमा लाहिरू मिलन्थाले अर्धशतक प्रहार गरे। उनले नटआउट ७५ रन जोड्ने क्रममा ५३ बलमा ९ चौका र ३ छक्का प्रहार गरे। हर्ष थाकरले नटआउट २९ रन जोडे। उनले ३३ बलमा २ चौका हिर्काए।
जनकपुरका ओपनरद्वय अनिल साह र आसिफ शेख भने चल्न सकेनन्। आसिफलाई विराटनगरका क्रिस सोलले पहिलो ओभरको चौथो बलमा शून्यमा बोल्ड गरे। दोस्रो ओभरको अन्तिम बलमा अनिललाई विराटनगरका प्रतिश जिसीले पनि ५ रनमा बोल्ड गरेका थिए।
त्यसपछि जनकपुरका लाहिरू मिलन्था र हर्ष थाकरबीच तेस्रो विकेटका लागि नटआउट ११६ रनको साझेदारी भयो। मिलन्था अमेरिकामा क्रिकेट खेल्ने श्रीलंकन मूलका खेलाडी हुन्। थाकर क्यानडाका अलराउन्डर हुन्।
उद्घाटन खेलमा विराटनगरले मार्टिन गप्टिलको अर्धशतकका बावजुत कमोजर ब्याटिङ गर्यो। टस जितेको जनकपुर बोल्ट्सले फिल्डिङ रोजेपछि पहिले ब्याटिङ गरेको विराटनगर १९ ओभरमा १२७ रनमा अलआउट भयो।
विराटनगरका लागि न्युजिल्यान्डका गप्टिलले ५५ रन जोड्ने क्रममा ७ चौका र १ छक्का प्रहार गरे। १४औं ओभरको अन्तिम बलमा उनी हर्ष थाकरको बलमा जनकपुरका कप्तान अनिलकुमार साहबाट क्याच भए।
विराटनगरको अर्का ओपनर लोकेश बम ५ रन बनाएर खेलिरहदा दोस्रो ओभरमा ललित राजवंशीबाट बोल्ड भएका थिए। नवौं ओभरमा विराटनगरले दोस्रो विकेट गुमायो। ओमानी ब्याटर अकिब इल्यासलाई १५ रनमा मोहमद मोहसिनले एलबिडब्लूको धरापमा पारे।
तेस्रो विकेटको रूपमा निकोलास किर्टोन आउट भए। उनलाई १२औं ओभरको अन्तिम बलमा हर्ष थाकरले आउट गरे। आउट भएका किर्टोन र विकेट लिने थाकर दुवै क्यानडाका हुन्।
राजेश पुलामी मगर १६औं ओभरमा १ रनमा रनआउट भए। १७ औं पहिलो बलमा प्रतिश जिसीलाई ललित राजवंशीले २ रनमा बोल्ड गर्दा विराटनगर दबाबमा आयो। दुई बलपछि बसिर अहमदलाई ललितले ७ रनमा आउट गर्दा विराटनगरले ७ विकेटको क्षतिमा १०४ रन मात्र जोडेको थियो।
कप्तान सन्दीप लामिछाने १८औं ओभरमा आठौं विकेटको रुपमा ७ रनमा क्याच आउट भए। लगत्तै अर्को बलमा जितेन्द्र मुखिया बोल्ड भए। दुवैलाई किशोर महतोले सिकार बनाए। क्रिस सोल अन्तिम विकेटको रुपमा १९औं ओभरको अन्तिम बलमा बेन माइकको बलमा मोहसिनबाट क्याच भए।
बलिङमा जनकपुरका ललित राजवंशीले ३ विकेट लिए। उनले ४ ओभरमा २८ रन खर्चिए। किशोर महतो र हर्ष थाकरले २९२ विकेट लिए भने बेन माइक र मोहमद मोहसिनले १९१ विकेट लिन सफल भए। एनपिएलमा आइतबार स्थानीय निर्वाचनका कारण कुनै खेल हुनेछैन्। एनपिएलका खेलहरू पर्सी सोमबारदेखि सुचारू हुनेछन्।
पहिलो खेल जितेपछि जनकपुरका कप्तान अनिल भन्छन् हामीले खेलको मजा लियौं:
जनकपुरले विराटनगर किंग्समाथि ८ विकेटको जितका साथ एनपिएलको यात्रा सुरू गरेको हो। खेलपछि जनकपुरका कप्तान अनिलकुमार साहले प्रतियोगितामा विजयी सुरूआत गर्न पाउँदा खुसी लागेको बताए। ‘खेलको निकै मजा लियौं। एनपिएलका खेल ठूला हुन्छ भन्ने थाहा थियो। त्यसैले हामीले खेलका लागि तयारी गरेका थियौं,’ खेलपछि उनले भने,
‘जितका साथ प्रतियोगिता सुरूआत गर्न पाउँदा खुसी लागेका छ। हामी उत्साहित छौं। यो नेपालको सबैभन्दा ठूलो प्रतियोगिता हो। सबैले लिगलाई सफल बनाउन समर्थन गर्नुपर्छ जस्तो लाग्छ।’
उनले खेलमा प्रशिक्षक पुबुदु दासानायकेको योजनाले काम गरेको पनि बताए। हामीले खेलका लागि सजिलो योजना बनाएका थियौं,’
उनले भने, ‘हामी सबैले आ-आफ्नो उत्कृष्ट खेल्ने तयारी गरेका थियौं।’
स्पिनर ललित राजवंशी आफ्नो टोलीका लागि म्याच विनर भएको पनि उनले बताए। खेलमा ललितले तीन विकेट लिएका थिए। साथै तीव्र गतिका बलर किशोर महतोले पनि टोलीमा राम्रो प्रभाव पारेको समेत उनको भनाइ थियो। ‘किशोरले अस्ट्रेलियामा खेलिरहेको थियो। हामीले उसलाई नेपाल बोलाउन तयारी गरेका थियौं,’ अनिलले भने।
खेलमा ब्याटिङमा अमेरिकामा बसेर क्रिकेट खेल्ने श्रीलंकन मूलका ब्याटर लाहिरू मालिन्थाले नटआउट ७५ रन जोडे। साथै क्यानडाका अलराउन्डर हर्ष थाकरको पनि जनकपुरको टोलीमा राम्रै प्रभाव पर्यो। उनले नटआउट २९ रन जोड्दा २ विकेट लिए।
