निर्मला हत्याकाण्डको अनुसन्धानमा प्रहरीकै मत बाझियो, हेडक्वार्टरमा लगातार छलफल

निर्मला हत्याकाण्डको अनुसन्धानमा प्रहरीकै मत बाझियो, हेडक्वार्टरमा लगातार छलफल

जिल्ला प्रहरी कार्यालय कञ्चनपुर

बलात्कारपछि हत्या गरिएकी कञ्चनपुरकी निर्मला पन्तको अनुुसन्धानलाई लिएर प्रहरी अधिकृतकै मत बाझिएको छ ।फरक–फरक समयमा अनुसन्धानका लागि खटिएका प्रहरी अधिकृतको मत बाझिएको हो । मत बाझिएपछि प्रहरी प्रधान कार्यालय ‘प्रहरी हेडक्वार्टर’ले हालसम्म अनुसन्धानमा खटिएका सबै अधिकृतहरुसँग छलफल सुरु गरेको छ ।

जसमा तत्कालीन कञ्चनपुर प्रहरीका एसपी दिल्लीराज विष्टदेखि पछिल्लो समयसम्म खटिएका प्रहरी अधिकृतसम्मलाई हेडक्वार्टरमा बोलाएर लगातार छलफल भइरहेको स्रोतले जानकारी दिएको छ । अनुसन्धानमा खटिएका प्रहरी अधिकृतले निर्मलाको हत्यामा फरक फरक राय दिएपछि प्रहरी प्रधान कार्यालयले नै यो विषयलाई चासोका साथ हेरेको जनाएको छ ।

प्रहरीको एक टोलीले घटनामा दिलिप विष्टकै संलग्नता रहेको दाबी गर्दै आएका छन् भने अनुसन्धानमा खटिएका धेरैजसो प्रहरी अधिकारीले दिलिप नै बलात्कार र हत्यामा संलग्न भएको दाबी गर्न नसकिने तर्क गर्दै आएका छन् ।आईजीपी शैलेश थापा क्षेत्रीको निर्देशनमा निरज शाही र विश्वराज पोखरेलले सबैसँग छलफल सुरु गरेका हुन् ।

छलफलमा सहभागी एक प्रहरी अधिकृतले भने,“दुई चरणमा छलफल भएको छ । फेरि छलफल गर्ने र सबैको रिपोर्टिङ सुन्ने कुरा छ । खासगरी सुरुवाती नेतृत्व र अनुसन्धान टोलीले दिलिपलाई नै अभियुक्त भनेका छन् । अधिकांश अनुसन्धान अधिकृतले त्यसलाई अस्वीकार गरेका छौँ ।

हाम्रा बीचमा नै घटनास्थल, अनुसन्धान पद्धतीलगायत विविध विषयमा फरक मत छन् ।” हालसम्म निर्मला हत्याकाण्डको अनुसन्धानमा १६ बढी प्रहरी अधिकृत खटिइसकेका छन् । बलात्कारपछि हत्या भएको साढे २ वर्ष बितिसक्दा पनि प्रहरीले अभियुक्तको पहिचान गर्न सकेको छैन । प्रहरीले भने घटनालाई विभिन्न कोणबाट अनुसन्धान गरिरहेको दाबी गर्दै आएको छ ।

स्रोतका अनुसार आईजीपी क्षेत्रीले तीन महिनाभित्र सफलता हात पार्ने गरी तल्लो तहलाई निर्देशन दिएको बताइएको छ ।०७५ साउन १० गते कञ्चनपुरको भीमदत्तनगर २ कि १३ वर्षीया किशोरी निर्मला पन्त ‘नोट’ लिन साथीको घर गएकी थिइन् । भासी जान निस्किएकी निर्मला साउन ११ गते घरभन्दा झन्डै डेढ किलोमिटरको दुरीमा रहेको उखुबारीमा मृत फेला परेकी थिइन् ।

अनुसन्धान र मेडिकल रिपोर्टबाट उनको बलात्कारपछि हत्या भएको खुलेको थियो । निर्मला हत्याकाण्डको अनुसन्धानमा सफलता प्राप्त नहुँदा प्रहरीको आलोचना हुँदै आएको छ । घटनाको सुरुवाती समयदेखि नै केन्द्रीय अनुसन्धान व्युरोको विषेश टोली कञ्चनपुरमै छ । हत्यामा चिनजानकै व्यक्तिको संलग्नता हुनसक्ने प्रहरी आशंका छ ।

प्रहरीले ०७५ भदौमा ३९ वर्षीय दिलिप सिंह विष्टलाई निर्मला हत्याकाण्डको अभियुक्तको रुपमा सार्वजनिक गरेको थियो । तर निर्मलाको स्वाबसँग डीएनए नमिलेपछि उनी छुटेका थिए । तत्कालीन समयमा दिलिपलाई सार्वजनिक गरेका प्रहरी अधिकारीहरु उनीबाहेक अर्कोको संलग्नता हुनै नसक्ने दाबी गर्दै आएका छन् ।

तर अन्य प्रहरी अधिकृतहरु त्यो दाबी मान्न तयार देखिँदैनन् ।  प्रहरीले हालसम्म ८० जनाको डीएनए परीक्षण गरिसकेको छ । -बाह्रखरीबाट

प्रतिक्रिया दिनुहोस्

सम्बन्धित समाचार