धनगढीः नेपाली भाषाका आदिकवि भानुभक्त आचार्यको दुई सय आठौं जन्मजयन्ती आज विभिन्न कार्यक्रम गरेर मनाइदैछ ।
सरल नेपाली भाषामा लेखिएको ‘रामायण’लाई भावानुवाद गरेर भानुभक्तले नेपाली जनतालाई ठूलो गुन लगाउनुभएको थियो ।
उहाँले लेखेको रामायण अहिले पनि नेपालीको घरघरमा सस्वर लय हालेर पाठ गरिन्छ । तत्कालिन राजा पृथ्वीनारायण शाहले भौगोलिकरूपमा एकीकरण गरेको नेपाललाई आदिकवि भानुभक्तले भाषा, साहित्य र संस्कृतिमार्फत एकीकरण गर्नुभएको मानिन्छ ।
विक्रम संवत १८७१ सालमा तनहुँको चुँदीरम्घा गाउँमा जन्मिनुभएका भानुभक्त एक जना घाँसीबाट प्रेरित भएपछि रामायणलाई नेपालीमा रचना गर्नुभएको मानिन्छ ।
उहाँको बधुशिक्षा, प्रश्नोत्तर, भक्तमाला लगायतका कृतिहरु पनि प्रकाशित छन् । भानु जयन्तीको अवसरमा नेपाल लगायत भारतको सिक्किम, दार्जीलिङ एवं नेपाली भाषी बसोबास गर्ने विश्वका अन्य देशहरुमा पनि विविध कार्यक्रम आयोजना गर्ने गरिएको छ ।
