धनगढी : अपाङ्गता भएका व्यक्तिहरूलाई पहुँचयुक्त मतदान केन्द्र व्यवस्थापन गर्न माग गरिएको छ । सोमबार राष्ट्रिय अपाङ्ग महासघं सुदूरपश्चिम प्रदेशले पत्र सहित ध्यानाकर्षण गराएको हो ।
यही मङ्सिर ४ गते सम्पन्न हुन गइरहेको प्रतिनिधि सभा सदस्य तथा प्रदेश सभा सदस्य निर्वाचन २०७९ मा तय गरिने मतदान स्थल र मतदान केन्द्र निर्वाचन सम्बन्धी प्रतिनिधि सभा सदस्य निर्वाचन ऐन २०७४, प्रदेश सभा सदस्य निर्वाचन २०७४, निर्वाचन क्षेत्र निर्धारण ऐन २०७३ र निर्वाचन आयोग ऐन २०७३ बमोजिम अपाङ्गता भएका व्यक्ती, ज्येष्ठ नागरिक, गर्भवती महिलाहरूलाई सहज रूपमा मतदान गर्न पाउने गरी पहुँचयुक्त मतदान केन्द्र व्यवस्थापन गर्न माग गरिएको हो ।
एक कार्यक्रमका बिच राष्ट्रिय अपाङ्ग महासघं सुदूरपश्चिम प्रदेशका अध्यक्ष मानबहादुर साउँद, आई एल सेन्टरका अध्यक्ष भीम बहादुर शाह, नेपाल अपाङ्ग सङ्घका सदस्य रामचन्द्र जोशी र राष्ट्रिय अपाङ्ग महासङ्घ प्रदेश कार्यालयकी कर्मचारी निता बिष्ट लगायतको टिमले कैलालीका मुख्य निर्वाचन अधिकृत ओमप्रसाद अर्याल र प्रदेश निर्वाचन आयोगका निमित्त प्रदेश निर्वाचन अधिकारी प्रेमराज भट्टलाई ध्यानाकर्षण पत्र पेस गरेका हुन् ।
पत्र हस्तान्तरणका पश्चात् निर्वाचन अधिकारी भट्ट र अर्यालले कैलाली क्षेत्र न ५ र कैलाली क्षेत्र न ४ का १० वटा नमुना मतदान केन्द्र निर्माण गर्ने र यसका साथै सुदूरपश्चिम प्रदेशमा जति पनि मतदान केन्द्रहरू छन् उक्त मतदान केन्द्रहरूमा सबै प्रकारका अपाङ्गता भएका व्यक्तिहरूलाई सहज र पहुँचका साथ अपाङ्गता मैत्री बनाउने कुरामा प्रतिबद्धता जनाएका छन् ।
