धनगढीमा सिसिएस १०+२ पोस्ट एसइई फुटसल प्रतियोगिता हुँदै

धनगढी : धनगढीको फ्ल्याटल्याण्ड फुटसल मैदानमा भोलि देखि सिसिएस १०+२ खुला फुटसल प्रतियोगिता सञ्चालन हुने भएको छ । धनगढी २ रातो पुलमा रहेको सिसिएस १०+२ ले आयोजना गर्न लागेको हो ।

उक्त प्रतियोगितामा करिब २० टिमको सहभागिता रहने र एसइई परीक्षा दिएर बसेका विद्यार्थिहरु लाई लक्षित गरी खेल आयोजना गरिएको प्रतियोगिता संयोजक सागर साउदले बताए ।

एसइई दिएर बसेका विद्यार्थिहरु फुर्सदिला रहेका र उनीहरूमा पठन संस्कृतिको ह्रास हुने कुरालाई ध्यानमा राखी पढाइ प्रति अभिरुचि अभिवृद्धि गर्न खेल आयोजना गरिएको स्कुलका प्राचार्य तीर्थराज फुलाराले बताए ।

दुई दिन सम्म सञ्चालन हुने उक्त प्रतियोगिताको विजेतालाई १५००० र उप-विजेतालाई ८००० नगद सहित मेडल र प्रमाणपत्र प्रदान गरिने आयोजकले जनाएको छ ।

सिसिएस १०+२ ले आयोजना गर्न लागेको यो पोस्ट एसइई फुटसल प्रतियोगिताको दोस्रो संस्करण हो ।