कैलालीको टीकापुरमा बाघको आक्रमणबाट एक महिला घाइते

कैलाली : कैलालीको टीकापुरमा बाघको आक्रमणबाट एक जना महिला घाइते भएकी छन्। कैलालीको टीकापुर नगरपालिका वडा नं २ स्थित सामुदायिक वनमा गइरहेकी वडा नम्बर २ विजयनगर खडक टोलकी ३५ वर्षीय फूलकुमारी चौधरी बाघको आक्रमणबाट घाइते भएकी हुन्।

सोमबार बिहान जानकी गाउँपालिका वडा नं.६ स्थित कैलाशेश्वर सामुदायिक वनमा घाँस काट्न जाँदै गर्दा उनी बाघको आक्रमणमा परेकी थिइन्। आक्रमणबाट उनको पेट र पिठ्यूमा चोट लागेको छ।

इलाका प्रहरी कार्यालय टीकापुरले दिएको जानकारी अनुसार घाइते चौधरीको टीकापुर अस्पतालमा सामान्य उपचार थप उपचारका लागि नेपालगञ्ज रेफर गरिएको छ। वडा नम्बर २ को अधिकांश स्थानमा जंगल क्षेत्र पर्ने भएकाले घाँस दाउँरा काट्न जाँदा सजग भएर जान वडाध्यक्ष दीपक चौधरीले आग्रह गरेका छन्।

यसअघि समेत सो क्षेत्रमा बाघको आक्रमणबाट केही व्यक्ति घाइते भएका थिए। राष्ट्रिय गौरवको रानी, जमरा, कुलरिया कुलाको रानी कुलाको मुख्य इन्टेक क्षेत्रमा विगत चार महिना यता डमरुसहितको बाघहरू देखा पर्दै आएका छन्। कैलाशेश्वर सामुदायिक वनका कोषाध्यक्ष रविन्द्र शाहका अनुसार कर्णाली नदी किनारको सो क्षेत्र बाघको आश्रय स्थलका रुपमा रहँदै आएको छ। हरेक वर्षायाममा सो क्षेत्रमा बाघहरू देखा पर्दै आएका छन्,’ कोषाध्यक्ष शाहले भने, ‘पछिल्लो चार महिनामा डमरुसहितका ३/४ बाघहरू देखा परिरहकाले सबैले सचेत रहनुपर्छ।’

कर्णाली नदी पारी रहेको बर्दिया राष्ट्रिय निकुञ्जबाट समेत बाघहरु डमरु हुर्काउन सो क्षेत्रमा आउने गरेको स्थानीयहरू बताउँछन्।