धनगढी : राष्ट्रिय सभा निर्वाचनका लागि सुदूरपश्चिमबाट ६ जनाले उम्मेदवारी दर्ता गराएका छन् । सुदूरपश्चिममा सत्तारुढ दल र एमालेका उम्मेदवारहरुले उम्मेदवारी दर्ता गराएका हुन् ।
धनगढीस्थित निर्वाचन आयोगको प्रदेश निर्वाचन कार्यालय धनगढीमा दुबै पक्षका उम्मेदवारले उम्मेदवारी दर्ता गराएका थिए । सत्तारुढ गठबन्धनबाट कञ्चनपुर कांग्रेसका सभापति बलदेव बोहरा र अपाङ्ग तथा अल्पसङ्ख्यकका तर्फबाट कैलाली कांग्रेसका सभापति नारायणदत्त भट्टले उम्मेदवारी दर्ता गरेका छन् । भट्ट दोस्रो जनआन्दोलनबाट घाइते भएका थिए ।
यस्तै, सत्ता गठबन्धनबाटै महिलाबाट माओवादी केन्द्रका रेनु चन्दले उम्मेदवारी दर्ता गरेकी छिन् । चन्द २०६४ सालको संविधान सभा सदस्य हुन् ।
एमालेका तर्फबाट कञ्चनपुरका ईश्वरीप्रसाद खरेल, कैलालीकी सावित्री घिमिरे र कैलालीकै रामचन्द्र जोशीलाई उम्मेदवारी दर्ता गराए ।
खरेल केन्द्रीय लेखा आयोग सदस्य हुन् । घिमिरे अनेमसङ्घ कैलालीकी पूर्वअध्यक्ष तथा जोशी एमालेको भ्रातृ सङ्गठन अपाङ्ग सङ्घका केन्द्रीय सदस्य हुन् ।
आगामी ११ माघमा हुने राष्ट्रिय सभा निर्वाचनका लागि मतदान हुनेछ । सुदूरपश्चिम प्रदेशमा प्रदेश सभा सदस्य तर्फको मतदाता सङ्ख्या ५२ तथा गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख तर्फको मतदाता सङ्ख्या १७६ गरी जम्मा २२८ जना मतदाता कायम भएका छन्।
