धनगढी: विश्व उपभोक्ता अधिकार दिवसको अवसर पारेर धनगढी उप-महानगरपालिकामा अन्तरक्रिया कार्यक्रम गरिएको छ ।
धनगढी उप–महानगरपालिका र वाणिज्य आपूर्ति तथा उपभोक्ता संरक्षण कार्यालयको आयोजना तथा राष्ट्रिय उपभोक्ता मञ्च र उपभोक्ता हकहित संरक्षण मञ्चको समन्वयमा अन्तरक्रिया कार्यक्रम भएको हो ।
सरोकारवालाहरू बिच भएको अन्तरक्रिया कार्यक्रममा सहभागीहरूले बजार अनुगमनलाई प्रभावकारी बनाउनुपर्ने, उपभोक्ता शिक्षाका कार्यक्रमहरू सञ्चालन गरिनुपर्ने, अनुगमनलाई चाडपर्व केन्द्रित मात्रै बनाउन नहुने सुझाव राखेका थिए । कार्यक्रममा वाणिज्य आपूर्ति तथा उपभोक्ता संरक्षण कार्यालय प्रमुख कमल पुन, उज्ज्वल कोइराला र उपभोक्ता हकहित संरक्षण मञ्च कैलालीका अध्यक्ष धनपति ढुङ्गेलले प्रस्तुतीकरण गरेका थिए ।
कार्यक्रममा बोल्दै धनगढी उप–महानगरपालिकाका नगरप्रमुख नृपबहादुर वडले बजारमा गुणस्तरहित बस्तुको विक्री वितरण रोकथामका लागि उपभोक्ता शिक्षा आवश्यक रहेको बताए । बुझेकै उपभोक्ताले पनि गुणस्तरका विषयमा ख्याल गरेको पाइँदैन नगरप्रमुख वडले भने, ‘ यसका लागि स्वयं उपभोक्ता बढी सचेत हुनुपर्ने देखिन्छ ।’ उपभोक्ता सचेत भएमा गलत गर्नेले पनि गर्न नसक्ने नगरप्रमुख वडले बताए ।
धनगढी उप–महानगरपालिकाका उप–प्रमुख तथा नगर स्तरीय बजार अनुगमन समितिका संयोजक सुशीला मिश्र भट्टले मूल्यलाई मात्रै ध्यान दिँदा उपभोक्ताहरू चुक्ने गरेको बताइन । कम मूल्यमा बस्तु पाइएमा उपभोक्ताहरू त्यसको खरिद गर्दछन् उप–प्रमुख भट्टले भनिन्,‘ जसका कारण उपभोक्ताहरू सम्म गुणस्तर हीन बस्तु पुग्ने गर्दछ । नियमन प्रक्रियालाई प्रभावकारी बनाउनका लागि आम सञ्चार माध्यम, उपभोक्ता र सरोकारवालाहरूले सक्रिय भूमिका खेल्नुपर्ने उप–प्रमुख भट्टले बताइन ।
धनगढी उप–महानगरपालिकाका प्रमुख प्रशासकीय अधिकृत हरी बहादुर चन्दले हामी उपभोक्ताहरू नै हौ भनेर सबैले सोचेमा गुणस्तर हीन बस्तु बजार सम्म नपुग्ने बताए । अन्तरक्रियामा नेपाल पत्रकार महासंघ कैलालीका अध्यक्ष जगत सावद, उद्योग पर्यटन बन तथा वातावरण मन्त्रालयका उप–सचिव राम बिचारी ठाकुर र कैलाली उद्योग वाणिज्य संघका महासचिव ओम विष्टले धारणा राखेका थिए ।
