धनगढी: नेपाल फोटो पत्रकार महासङ्घ कैलाली शाखाले १८२ औँ विश्व फोटोग्राफी दिवसको अवसरमा मास्क वितरण गरेको छ ।
तेस्रो लहरको कोरोना भाइरस (कोभिड-१९) को सङ्क्रमणलाई रोकथाम तथा नियन्त्रणको लागि फोटो पत्रकार महासङ्घ कैलाली शाखाका क्रियाशिल सदस्यहरूको उपस्थितिमा महासङ्घले मास्क वितरण गरेको हो ।
जोखिम न्यूनीकरणका लागि महासङ्घ द्वारा आयोजित मास्क वितरण अभियानलाई नेपाली काङ्ग्रेसकी नेतृ डा. आरजु राणा देउवाले मास्क सहयोग गरेकी थिइन् ।
मास्क वितरण कार्यक्रममा नेपाल पत्रकार महासङ्घ सुदूरपश्चिम प्रदेश अध्यक्ष योगेश रावल, प्रेस युनियन कैलालीका अध्यक्ष श्रवण देउवा तथा नेपाल फोटो पत्रकार महासङ्घ कैलालीका सदस्यहरूको उपस्थिति रहेको थियो ।
मास्क वितरण कार्यक्रमको उद्घाटनमा प्रदेश अध्यक्ष रावलले १८२ औँ विश्व फोटोग्राफी दिवसको शुभकामना व्यक्त गर्दै महामारी बढी रहेको समयमा निःशुल्क मास्क वितरण गर्नु उदाहरणीय कार्य भएको बताए । यस्तै महामारी बढिरहेको भन्दै पत्रकारहरूलाई सुरक्षा मापदण्ड अपनाएर रिपोर्टिङ गर्न समेत अध्यक्ष रावलले सुझाए ।
फोटो पत्रकार र सुरक्षाकर्मीहरूको सहभागिता सर्वसाधारणलाई झन्डै एक हजार मास्क वितरण गरिएको थियो ।
