बैतडी : बैतडीमा एक ब्यापारी मृत फेला परेका छन् । जिल्लाको सुर्नया गाउँपालिका वडा न. ४ सन्सेरीमाण्डौँ बजारमा मासु पसल सञ्चालन गर्दै आएका सुर्नया ४ लेकडाँडा घर भएका अन्दाजी ४५ बर्षका कमलसिंह महरा मृत फेला परेका हुन् ।
उनी आज बिहान मृत अवस्थामा फेला परेको प्रहरीले जनाएको छ । बिहानको समयमा स्थानियबासीले महराको शव देखेपछि प्रहरीलाई खबरका थिए । मृतक महराको टाउकोमा गम्भीर चोट रहेको बताइएको छ ।
घटना राती १० बजे पछिको समयमा भएको हुनसक्ने स्थानियबासीहरुले अनुमान लगाएका छन् । मृतकको टाउकोमा गम्भीर चोट रहेकाले हत्या गरेर फालेको हुनसक्ने आशंका गरिएको छ ।
यतिबेला इलाका प्रहरी कार्यालय पाटनवाट प्रहरीको टोली घटनास्थल पुगेको छ । घटनाका बिषयमा सुक्ष्म रुपमा अनुसन्धान सुरु गरिएको प्रहरी निरिक्षक राजेश शाहीले जानकारी दिए ।
