धनगढी । पछिल्लो समय जन्मदिन तथा विभिन्न उत्सवहरू तडकभडक, भोजभतेर र अनावश्यक खर्चमा सीमित भइरहेका बेला धनगढीका एक युवाले आफ्नो जन्मोत्सवलाई गौसेवासँग जोड्दै समाजमा प्रेरणादायी उदाहरण प्रस्तुत गरेका छन् ।
कैलालीको धनगढी उपमहानगरपालिका–३ चटकपुरस्थित कृष्ण मोहना गौशाला गौ संरक्षण सेवा समितिमा धनगढीका युवा आशुतोष सिंह ले जन्मोत्सवको अवसरमा गौशालामा आश्रित गाईहरूलाई फलफूल सेवा गर्दै जन्मदिन मनाएका हुन् ।
सामान्यतया होटल, पार्टी प्यालेस तथा मनोरञ्जनमा खर्च गरिने रकमलाई सकारात्मक कार्यमा रूपान्तरण गर्दै उनले गौशालामा रहेका गाईहरूलाई फलफूल खुवाएका थिए । उनले आफ्ना साथीहरूलाई समेत उक्त सेवामूलक अभियानमा सहभागी गराउँदै जन्मोत्सवलाई सामाजिक उत्तरदायित्वसँग जोड्ने प्रयास गरेका हुन् ।
हिन्दु धर्मशास्त्रमा गाईलाई ‘गौमाता’का रूपमा पूजनीय मानिन्छ । धार्मिक आस्था, संस्कार तथा संरक्षणको दृष्टिकोणले गौसेवालाई पुण्य कर्मका रूपमा लिइने गरिन्छ । यस्ता कार्यले केवल धार्मिक भावनालाई मात्र सम्मान गर्दैन, समाजमा करुणा, संरक्षण र सहअस्तित्वको सन्देश समेत प्रवाह गर्ने गर्दछ ।
युवा सिंहले गौसेवा गर्न पाउँदा आफूलाई आत्मसन्तुष्टि र विशेष खुसी महसुस भएको बताए । उनले आफ्नो विशेष दिनहरूमा अनावश्यक खर्चभन्दा गौसंरक्षण, मानवसेवा तथा सामाजिक कार्यमा योगदान गर्न सबैलाई आग्रह समेत गरेका छन् ।
पछिल्लो समय युवापुस्तामाझ बढ्दै गएको प्रदर्शनमुखी संस्कृतिका बीच आशुतोष सिंहले गरेको यो कार्यलाई स्थानीयवासीले सकारात्मक र अनुकरणीय कदमका रूपमा प्रशंसा गरेका छन् ।
