धनगढीः बैतडीको सुर्नया गाउँपालिकाको गाडी इन्जिनियर कपिलदेब भट्टले चलाउँदा दुर्घटनामा परेको छ । सोमबार साँझ ६ बजे गाउँपालिका –५ बाट वडा नम्बर ४ तर्फ जाँदै गरेको गाउँपालिकाको से १ झ २८७ नम्बरको गाडी डडेश्वर मन्दिर नजिक दुर्घटनामा परेको हो ।
गाडीमा इन्जिनियर कपिल देब भट्ट चालक चन्द्रबहादुर मडै सुर्नया गाउँपालिका–६ अध्यक्षका छोरा सुरेश कुवँर र लेखापाल अशोक भट्ट रहेको प्रत्यक्षदर्शी स्थानीयले बताएका छन् । स्थानीयका अनुसार गाडीमा सवार रहेकाहरुले मदिरा सेवन गरेको र गाडीको फोटो खिच्न खोज्दा गाली बेईज्जत गरी धम्काएको बताएका छन् ।
चालक चन्द्रबहादुर मडैले गाडी इन्जिनियर कपिलदेब भट्टले चलाएको स्विकार गरेका छन् । पहिला पनि गाडी चलाउने गरेको भएर भटटलाई चलाउन दिएको चालक मडैले बताए ।
यता प्रहरीले भने गाडीमा सवार कसैलेपनि मदिरा सेवन नगरेको रिपोर्ट जिल्लामा पेश गरेको छ । सुर्नया प्रहरी चौकीका ईन्चार्ज असई टेकबहादुर खडकाले गाडी दुर्घटना भएको ५ घण्टापछि मदिरा सेवनको स्वास्थ्य परिक्षण गर्न स्वास्थ्य चौकी लिएर आएको स्वास्थ्य चौकी ईन्चार्ज नरेश मडैले बताए ।
स्वास्थ्य चौकीमा मदिरा सेवन गरेको चेक गर्ने उपकरण नभए पनि उनिहरुको हावभाव बोली चाली तथा हिँडाई हेर्दा उनिहरुले मदिरा सेवन गरेको नपाएको स्वास्थ्य चौकी ईन्चार्ज मडैले बताए । तर स्थानीयहरुले भने गाडीमा सवार सबैजनाले मदिरा सेवन गरेको बताए । अहिले उक्त गाडीलाई मर्मत गर्न मंगलवार बिहान १ बजे रातारात धनगढी लगेको स्थानीयले बताए ।
