बैतडीः बैतडीको पुर्चौंडी नगरपालिकाले सोमबारबाट कोभीड-१९ अस्थायी अस्पताल सञ्चालनमा ल्याएको छ ।
कोभीड अस्थायी अस्पताल सञ्चालनका लागि संघीय सरकारले १० लाख रकम पठाएपछि बैतडीको पुर्चौंडी नगरपालिकाले अस्पताल सञ्चालनमा ल्याएको हो ।
जिल्लाका अन्य स्थानीय तहहरुले अस्पताल सञ्चालनको प्रक्रिया मात्रै शुरु थालेको जनएका छन् । उनिहरुले मेडिकल अधिकृत पाउनै मुस्कील भएकोले अस्थायी अस्पताल सञ्चालनमा ल्याउन समस्या भएको बताएका छन् ।
पुर्चौंडी नगरपालिकामा १ जना मेडिकल अधिकृत, २ जना स्टाफ नर्स र एक जना कार्यालय सहयोगीको दरबन्दी पदपूर्ती गरेर सोमबारदेखि कोभीड अस्थायी अस्पताल सञ्चालनमा ल्याइएको पुर्चौंडी नगरपालिकाका सिनियर अहेब हेमराज भट्टले जानकारी दिनुभयो ।
नगरपालिकाले हाट स्वास्थ्यचौकीको पुरानो भवनमा ५ शैयाको अस्पातल सञ्चालनमा ल्याइएको उहाँले जानकारी दिनुभयो । पुर्चौडी नगरपालिकामा कोभीड अस्थायी अस्पताल सञ्चालनमा आएपछि कोरोनाका बिरामीको उपचारका लागि सजिलो हुने भएको छ ।
पुर्चौंडी नगरपालिकाका प्रवक्ता दलबहादुर धामीको अध्यक्षतामा भएको एक कार्यक्रमकाबीच अस्पतालको उद्दघाटन गरिएको हो । अस्पातल उद्दघाटन कार्यक्रममा नगरपालिकाका प्रमुख रणबहादुर कुँवर र उपप्रमुख जानकी ऐर बम को समेत उपस्थिति रहेको थियो ।
