काठमाडौं: निर्वाचन आयोगमा दर्ता नभएको नेपाल कम्युनिस्ट पार्टीका महासचिव नेत्रविक्रम चन्द विप्लवले दर्ता भएको नेपाल कम्युनिस्ट पार्टीका अध्यक्ष केपी शर्मा ओलीलाई धन्यवाद दिएका छन् । उनले आफ्नो पार्टीलाई प्रतिबन्ध लगाएको भन्दै प्रधानमन्त्री समेत रहेका नेकपा अध्यक्ष ओलीलाई धन्यवाद दिएका हुन् ।
‘प्रतिबन्धलाई अवसर र चुनौती अथवा खुशीको कुरा पनि बनेको छ,’ विप्लवले भने । उनले आफूहरुले जनताको पक्षमा काम गरेको र भ्रष्टाचारको विरोध गरेकाले प्रतिबन्ध लगाउने कार्य भएको बताए । उनले आफूहरु देश र जनताको पक्षमा उभिएको दाबी गरे ।
प्रधानमन्त्री केपी शर्मा ओली नेतृत्वको सरकार असफल भएको भन्दै विप्लवले नयाँ संविधान निर्माण र नयाँ राज्य प्रणाली स्थापित गर्न लागिपरेको बताए । उनले सरकारले कोरोना भाइरसको त्रासदीमा जनता पीडित हुँदा धन कुम्ल्याउनेहरुको हितमा काम गरिरेको आरोप लगाए ।
