काठमाडौं : बारबरा फाउण्डेसनले चार जना पत्रकारलाई २५ लाख रुपैयाँको खोजमूलक पत्रकारिता पुरस्कार प्रदान गरेको छ । बिहीवार काठमाडौंमा आयोजित एक कार्यक्रममा फाउण्डेसनले चार जना पत्रकारलाई ‘खोजमूलक पत्रकारिता पुरस्कार–२०८१’ प्रदान गरेको हो ।
१६ लाख रुपैयाँको प्रथम पुरस्कार पत्रकार देवेन्द्र भट्टराई तथा मात्रिका दाहाललाई प्रदान गरिएको छ । नक्कली भुटानी शरणार्थी प्रकरणको खोजमूलक रिपोर्टिङ गरी उक्त प्रकरणलाई छानबिनको दायरामा ल्याउन सफल भएकोमा पत्रकारद्वय भट्टराई र दाहाललाई उक्त पुरस्कार दिइएको फाउण्डेसनले जनाएको छ ।
त्यस्तै, छ लाख रुपैयाँको दोस्रो पुरस्कार पत्रकार दिपा दाहाललाई प्रदान गरिएको छ । चौधरी ग्रुपको स्वामित्वमा गएको बाँसबारी छाला जुत्ता उद्योगको सरकारी जग्गाबारे गरिएको खोजमूलक रिपोर्टिङका लागि पत्रकार दाहाललाई उक्त पुरस्कार प्रदान गरिएको हो ।
त्यस्तै, तीन लाख रुपैयाँको तेस्रो पुरस्कार पत्रकार रमेश कुमारलाई प्रदान गरिएको छ । शेयर बजारमा भएको अनियमिताबारे गरिएको खोजमूलक रिपोर्टिङका लागि उनलाई उक्त पुरस्कार दिइएको हो ।
यसअघि फाउण्डेशनले उक्त पुरस्कारका लागि आवेदन आह्वान गरेको थियो । गत वैशाख २०७९ देखि चैत २०८० सम्म प्रकाशन–प्रसारणमा आएका अनुसन्धानमूलक समाचार सामग्रीमध्येबाट उक्त पुरस्कार दिइएको फाउण्डेशनले जनाएको छ ।
